140306 - ازاى نقدر نسافر و نستقر فى كوريا فى 8 خطوات بس على راديو سوجو إيجى مع ريم حاتم ^^

ازاى نقدر نسافر و نستقر فى كوريا فى 8 خطوات بس

اول حلقة من فقرة ازاى كانت يوم الاربع و علمتكوا ازاى تعيشوا قصة حب مع ابن بلدكوا على الطريقة الكورية..للناس اللى مسمعوناش يوم الاربع يقدروا ياخدوا فكرة عن الموضوع  ... من هنا ^^

بس فى ناس للأسف مقدروش يكملوا الخطوات بالظبط عشان كدة قررنا اننا نكمل جميلنا للآخر و ننزلكوا الخطة (بى) عشان محدش يقولنا ان احنا سبناكوا فى الاوقات الحرجة..

لو معرفتوش تصنعوا قصة حب كورية فى وطنكوا فاصنعوها فى وطنها الاصلى...فقرتنا النهاردة هتتكلم عن:

ازاى نقدر نعيش قصة الحب الكورية اللى احنا عايزنها من خلال السفر و الاستقرار فى كوريا...كتير منكوا هيسألونى ازاى..

انا اقولكوا..

كلنا طبعا حلمنا إننا نطير على كوريا و نقابل الاوبا بتعنا..او اقل حاجة إننا نروح نزور الاماكن الوااااو اللى بنشوفها على التلفزيون..

يا رب اوعدنااا..

عشان كدة أنا قولت اننا لازم نخدمكوا و نقدملكوا خطوات تساعدكوا انكوا تحققوا الحلم ده^^

الخطوة الاولى:رأس المال...

لازم قبل ما تاخدى قرار خطير زى الهروب الى كوريا تتأكدى انك معاكى فلوس تكفى انك تشترى تذكرة سفر و للمعيشة هناك مدة كافية لغاية ما تأمنى لنفسك شغل ..

طب انتى هتأمنى الفلوس ديه ازاى؟؟

اتصرفى يا ستى..كل واحد و طريقته بئى..اكيد مش هتغلبي..اشتغلى فى شركة كبيرة..اختلسى فلوس الشركة الكبيرة ديه..اسرقى بنك..

اهم حاجة تأمنى الفلوس اللى هتحتاجيها هناك..

الخطوة التانية:لمي عزالك...

لازم بعد ما تطمنى إنك حليتى مشكلة الفلوس تبدأى تشترى الحاجات اللى هتحتاجيها هناك..زى مثلا..بلاطى عشان الجو هناك

سقعة..كرمبتين..ملوخية..شوية مخلل فى حال لو الاكل هناك معجبكيش او لو وحشك اكل بلدك او لو طلع عليكى عصابة كورية و انتى ماشية فى شارع كوريا العمومى سرقوا فلوسك...محدش ضامن ايه اللى ممكن يحصل الايام ديه...

اهم حاجة هاااتى كللللل اللى انتى عايزاه و محتجاه..و شيلي الحاجات ديه لغاية ما تيجى اللحظة الحاسمة..لحظة سفرك الى كوريا..

الخطوة الثالثة:الهروب الى كوريا...

بعد ما تنفذى الخطوتين اللى فاتوا..هنيجى لأهم خطوة..

تروحى تحجزى تذكرتين سفر لكوريا ذهاااب بلا عودة....

هتسألينى طبعا ليه قولتلك تذكرتين؟!!!أنا هقولك..الموضوع بسيط جداا..واحدة ليكى و واحدة ليااا..

سمعاكى ياللى بتشتمى على فكرة و هجيبك.....ما علينااا..

احجزى تذكرة السفر لأول رحلة طالعة على كوريا..اوعى تتذاكى و تقولى اما الحق اودع اصحابى و اقولهم انى رايحة كورياا..لالالالالالالالا...انسى صحابك دلوقتى خالص..واحدة فيهم تديكى عين الطيارة تولع بيكى قبل ما تقطع نص المسافة اصلا..

قاطعى اصحابك..انسيهم...على الاقل فى الوقت حالى..لغاية ما تحققى هدفك النبيل و السامى و هو السفر الى كوريا..

الخطوة الرابعة:اتمسكنى لحد ما تتمكنى...

لما توصلى لأرض الوطن بسلام و يبئى كله تمام و الشطة..لازم تدورى على سكن بسيط تقعدى فيه لغاية ما ربنا يسهلها و تلاقى شغل..إياكى ثم إياكى ثم إياكى تروحى تعيشيلى فى شقة فخمة و محترمة او حتى تنزلى فى اوتيل..امسحى الكلام ده كله من دماغك

لو قولتيلى(ليييه ؟؟ما انا سرقت بنك و معايا فلوس كتير)

هقولك:فلوسك ممكن تخلص او تتسرق يا ازكى اخواتك..دارى على شمعتك تئييد..و المال الحرام مبيدومش

انتى بعد ما تلمى شنطك و تخرجى من المطار تاخدى بعضك و تدورى على منطقة شِعبية فى كوريا و تسألى عن شقة صغننة من اى اجوماا هناك..و تتمسكنلها و تحسسيها انك معدمة و محلتكيش اللضا عشان تصعبى عليها..و اوعي تقوللها انك سرقتى بنك قبل ما تيجى على كوريا عشان متطمعش فيكى....

الخطوة الخامسة:دورى على شغل...

بعد ما الاجوما توافق انها تديكى سكن و الكلام ده كله..متضيعيش وقت و انزلى بسرعة دورى على شغل هناااك..

هتسألينى تانى(طب و انا ادور على شغل ليه بئى و انا سارقة بنك؟؟)

أنا هفهمك...الاجوما متعرفش انك سارقة بنك..و كمان لو ادتيها الايجار من غير ما تشتغلى هتشك فى حاجة اكيد و مش هتسيبك فى حالك و عشان كدة لازمن ولا بد انك تشتغلى...

و كمان انتى رايحة كوريا عشان تعيشى زى اى فتاة كورية اصيلة و تلاقى الاوبا بتاعك..يبئى لازم تستحملى..

هتنزلى تدورى على شغل و يستحسن يكون فى اى مطعم او كافيه..و لما تأمنى وظيفة حاولى تحافظى عليها و اوعى تعملى اى مشاكل مع صاحب المطعم او الكافيه اللى انتى بتشتغلى فيه او تضربيه او تسرقيه هو كمان عشان ميرحلوكيش على بلدك و يبوظ كل اللى عملناه و فوق ده كله بدل ما يحبسوكى بتهمة واحدة هيحبسوكى بتهمتين..اكيد انتى منستيش البنك اللى سرقتيه عشان تهربى لكوريا.

الخطوة السادسة:دورى على (فلاور بوى) مؤقت...

انتى لازم تأمنى مستقبلك الكورى و متسمحيش انك تترحلى على بلدك تانى..عشان كدة لازم تدورى على (فلاور بوى) مؤقت..

و يستحسن (الفلاور بوى) ده يكون كيوت و غنى...

فى المسلسلات الكورى دايمااا بيكون فيه مثلث حب..الولد العسول الغنى اللى بيحبها و الولد البارد الرخم اللى هى بتحبه و فى الاخر هو كمان هيحبها برده...

نخلينا دلوقتى فى الغنى الكيوت بتعنا..هتكونى واقفة فى الكافيه او المطعم اللى بتشتغلى فيه متربصة و منتظرة اى شخص كيوت و غنى يهل عليكى..انتى لازم تنتهزى اى فرصة عشان تتعرفى عليه و تبدأى شغل المسلسلات الكورى اللى شوفتيها لغاية ما تقنعيه انكوا تتجوزوا بسرعة..

طبعا هو مش هيكون عارف انك هتتجوزيه عشان تاخدى الجنسية..اتجوزوا و اول ما تاخدى الجنسية الكورية اقنعيه انكوا لازم تنفصلوا عشان مصلحتوا هو...و اعملى عليه شوية جو مصرى بتاع الطار ولا العار..و بكده كل واحد فيكوا هيروح لحاله...

الخطوة السابعة:هترجعى تعيشى مع الاجوما...

فى الخطوة ديه هترجعى تعيشى مع الاجوما من تانى و هتضطرى تدورى على شغل جديد..بس المرادى هتروحى تشتغلى الشغل اللى اتهرى فى مليون فان فيكشن قبل كدة...

اكيد عرفتى الشغل ده هيكون ايه..

برافوا عليكى...هتروحى تقدمى فى شركة اس ام...و المرادى هتعملى اللى بتقرأيه فى كل الفان فيكشن اللى عرفتها البشرية..

هتعملى مشكلة مع الاوبا بتاعك و هتتخانقوا فترة و هو هيحبك..

ولااااااااااااااا اسهل...و ابتسامتك علينا... 

الخطوة الثامنة و الاخيرة:الاستقرار فى كورياااا...

و اخيرا تبدأ حياة الاستقرار فى كورياا بعد رحلة طووويلة من المعاناة...و بعد ما لقييتى ال (فلاور بوى) و وقعتى الاوبا بتاعك فى حبك...و اخيرا و عندما تكون الحياة الوردية على وشك البدأ..

و اخيرا و عندما تكون الحياة الوردية على وشك البدأ تتفاجئى بالبوليس طب عليكى و يرحلوكى على بلدك تانى بعد ما كل الادلة تشير انك انتى اللى سرقتى البنك فى بلدك...

مأســــــــــــــــــــــــــــــــــــاة

بس ثانية واحدة..انتى اخدتى الجنسية الكورية بالفعل..و بالتالى هيكون فى حل من اتنين,..

الحل الاول:"هتتسحب منك الجنسية الكورية و تترحلى على بلدك عشان تقضى باقى عمرك فى السجن..(مأســـــــــــــــــــــــاة)"

الحل التانى:"انك تتحبسى فى بلدك الثانى (اللى هى كوريا طبعا) و ساعتها هتكون نص مأســـــــاة..."

و زى ما عودناكوا طبعا اننا فى نهاية كل فقرة من فقرات ازاى بنحطلكوا تنويه عشان السلامة العامة...

تنويه:"صفحتنا سوجو ايجى و برنامجنا غير مسئول عن اى خطوة من الخطوات اللى فاتت..يعنى السلعة لا تستبدل ولا ترد ولا تستحدث من العدم و احنا ولا نعرفكوا..."